FACE 週刊
F012-013 | FACEweekly 2014-03-12
標示關鍵字 標示關鍵詞並按此開始搜索
如果命運能選擇葉念琛
一講導演葉念琛，不是愛，就是愛，還是愛！入行10年17套戲當中，過半為哭得你死我活的愛情電影，踏入導演路第10個年頭，反而拍了一套超多笑位、唔多講愛情、講人生講命運的《DELETE愛人》，講述男主角王祖藍一個唔鍾意就可以「刪除」身邊的人，咁葉導呢一世有乜最想刪除呢？
為甚麼今年突然轉型拍講人生的電影？
每天總有某某「阻住地球轉」，例如開會sell橋畀老闆時，突然間會有幾個塘邊鶴衝出來畀幾個意見，然後老闆又突然好民主地照單全收，反問我點解唔咁咁咁之類！我就諗如果可以變走這些人，世界應該會更美好。我就將呢條橋sell畀老闆蕭定一，佢話好得意，就開始咗呢個拍攝。我冇特別要拍非葉念琛的電影，我會以「唔穩定」來形容自己，我從來冇刻意塑造自己一定要拍愛情電影的。
戲中在手提電話回覆一個信息就可以delete身邊的人，潛意識是你不喜歡現今科技帶來的反感？
Delete愛人是超現實，如果說是神仙賜予這神力未免太陳腔濫調，反而想透過一些叫大家轉發的垃圾信息，講出這神力的存在，因為現實中，有幾多個人會查探垃圾信息的來源呢？況且通訊科技無孔不入，你看看前星期奧斯卡頒獎典禮的明星selfie，在Twitter轉發率過3百萬次，talking point又多了。
戲中有多位演員客串（當中更有兩位星級人物，葉導話絕不能透露！），當中和誰有破格合作？
片中每個角色如度身訂做，例如一諗起元秋就會係一個好惡嘅媽咪，咁如果變走佢，要一個善良的媽咪，會係邊個呢？即刻諗起了薛家燕。搵每個星客串我唔會諗佢會唔會肯拍，如果連問都唔問，機會一定冇。譬如今次服裝設計，我就首次找來藝術總監馬天佑搞服裝，因為套戲講變走身邊人好夢幻，我想成部戲嘅衫都好macaron style，所以就搵咗佢搞，結果好順利！
要在你人生中delete一樣東西，你會刪除甚麼？
我好想delete一出道前的輕狂，年輕時總會愛講錯說話，可能自己覺得好得意，但其實傷害到人都不知道，甚至乎試過飲醉講粗口鬧人！大個了就知自己做錯，如果當時這些不成熟沒有發生，就好好多。
故事大綱
蘇波榮（王祖藍 飾）是一個懷才不遇小人物，經常被同事出陰招偷橋搶功勞，令他事業失意。榮也從未嘗過家庭溫暖，因為阿媽對他漠不關心，當他搖錢樹；榮唯一知心好友華Dee（方力申 飾），又時常撞板闖禍連累他。女朋友鍾家寶（王菀之 飾），是他失意時的遮蔭大樹，唯一缺點是她周身病痛。諸事不順的榮，在萬念俱灰時收到一個奇怪短訊 :「你有想過delete不喜歡的那個他她？先轉給一個朋友！祝你願望成真！」榮手忙腳亂之下確認了短訊，從此便得到這匪夷所思的能力，把不喜歡的人通通delete掉！榮會否真的得到完美人生，永無後顧之憂的快樂？
《DELETE愛人》
導演：葉念琛
演員：王祖藍、王菀之、許冠文、方力申等
上映日期：5月8日
文章編號: 201403125560536
